Samkvæmt heimildum Handkastsins hefur málskotsnefnd HSÍ lagt á borð aganefndar atvik úr leik Aftureldingar og Fram í 5.umferð Olís-deildar karla á fimmtudagskvöldið í síðustu viku.

Um er að ræða brot Ívars Loga Styrmissonar leikmanns Fram á Ágústi Inga Óskarssyni leikmanni Aftureldingar. 

Samkvæmt heimildum Handkastsins barst aganefnd HSÍ sem hittist á þriðjudögum ekki málið fyrir tækatíð frá málskotsnefndinni og því var málið ekki tekið fyrir á fundi aganefndar á þriðjudaginn.

Níu mál voru tekin fyrir af aganefnd HSÍ en engin mál bárust frá málskotsnefndinni.

Verður þetta að teljast ansi athyglisverð vinnubrögð og hafa spurningar vaknað hvort verklagið í kringum nýja nefnd sem skipuð var í fyrsta skipti í sumar sé nægilega skýrt.

Í máli Ívars Loga barst aganefnd málið sex dögum eftir leik samkvæmt heimildum Handkastsins. 

Hafa aðilar innan handboltahreyfingarinnar verið í sambandi við ritstjórn Handkastsins í vikunni og rætt vinnubrögð málskotsnefndarinnar og verklag hennar.

Velta menn því fyrir sér hvort verið sé að opna á þann möguleika að þjálfarar og stjórnarmenn félaga í landinu gætu grafið upp brot sem ekki var tekið á, á sínum tíma og sent á málskotsnefnd HSÍ eða jafnvel sent á Handkastið og beðið Handkastið sem er leiðandi í umfjöllun um íslenskan handbolta um að birta brotin í aðdraganda leikja við það lið sem á við. 

Ljóst er að Ívar Logi verður í það minnsta löglegur í leik Fram og KA annað kvöld í 6.umferð Olís-deildar karla.

_{Hress styður umfjöllun Handkastsins um Þjóðaríþróttina - Í tilefni þess fá allir hlustendur og lesendur Handkastsins 2 fyrir 1 af öllum boozt á Hressbarnum út október. Hress er staðsett á Dalshrauni 11 í Hafnarfirði. Verði ykkur að góðu.}