29 sekúndum fyrir leikslok í bikarleik HK og Selfoss í 16-liða úrslitum Powerade-bikarsins tók Halldór Jóhann Sigfússon þjálfari HK leikhlé.

Það eitt og sér er kannski ekki frásögufærandi nema fyrir þær sakir að staðan í leiknum var 26-23 HK í vil og Selfyssingar gott sem búnir að játa sig sigraða.

Í bikarkeppni HSÍ er ekki leikið heima og heiman og því skipti markatalan engu máli í þessu leik. Í kjölfarið fóru allir leikmenn HK til Halldórs Jóhanns þjálfara HK eins og vaninn er í leikhléum og lét hann sennilega vel vönduð orð útúr sér fyrir síðustu 29 sekúndur leiksins.

Á sama tíma stóðu leikmenn Selfyssinga enn út á vellinum og biðu eftir að leikhlé-ið myndi klárast. Carlos Martin Santos þjálfari Selfoss hafði engan áhuga að segja eitt né neitt við sína leikmenn en á sama tíma lét Atli Kristinsson aðstoðarþjálfari Selfoss óánægju sína í ljós með því að stara í átt að HK-ingum.

Eftir að leiknum lauk hélt Atli áfram að sína óánægju sína, úr útsendingu af leiknum að dæma tók hann fast og þétt í hendina á Halldóri Jóhanni eftir leik og lét vel valin orð falla í garð Halldórs Jóhanns.

Atli Kristinsson var dæmdur í eins leiks bann fyrir hegðun sína eftir umræddan leik af aganefnd HSÍ í gær.

Atli verður því ekki á hliðarlínunni hjá Selfossi í kvöld þegar liðið fær Stjörnuna í heimsókn í 6.umferð Olís-deildar karla klukkan 18:00.

Hægt er að sjá atvikið í myndskeiðinu hér að neðan.