Sverrir Pálsson leikmaður Selfoss er kominn aftur á völlinn eftir að hafa gengist undir aðgerð á öxl í sumar. Eru þetta frábær tíðindi fyrir nýliða Selfoss í Olís-deildinni.

Sverrir er leikreyndasti leikmaður Selfoss og hefur verið máttarstólpur í varnarleik liðsins undanfarin ár. 

Sverrir varð samningslaus í sumar og þurfti að gangast undir aðgerð á öxl og óvissa ríkti um framhaldið hjá honum í sumar. 

Hann framlengdi hinsvegar samning sinn við Selfoss rétt fyrir tímabilið og var kominn aftur í lið Selfoss þegar liðið tapaði gegn HK 27-23 í 16-liða úrslitum Powerade-bikarsins á mánudagskvöldið.

Selfoss mætir Stjörnunni á heimavelli í kvöld klukkan 18:00 í 6.umferð Olís-deildar karla.