Janus Daði Smárason leikmaður Pick Szeged í Ungverjalandi er staddur í Barcelona á Spáni ásamt Emblu Jónsdóttur unnustu sinni og barni.

Það er nú kannski ekki frásögufærandi nema fyrir þær saki að Janus Daði var í síðasta mánuði orðaður við Barcelona.

Það er spænski íþróttafréttamaðurinn, Carlos Monfort sem greinir frá á X reikningi sínum þar sem hann birtir myndskeið af Janusi Daða og fjölskyldu hans í höfuðstöðvum Barcelona.

Talað var um að það væri einungis undirskriftin eftir á milli Barcelona og Janusar Daða í síðasta mánuði og nú virðist vera sem undirskriftin sé í höfn en Janus Daði sem meiddist á hné með liði sínu fyrr í mánuðinum hefur greinilega nýtt sér landsleikjafríið og skellt sér til Barcelona og klárað sín mál.

RThandball greinir einnig frá því að Janus Daði hafi ferðast til Barcelona í fyrradag og hafi síðan hitt forráðamenn Barcelona í gær sem rímar við það myndskeið sem Carlos Monfort birti í gær.

Janus Daði verður þar með liðsfélagi Viktors Gísla Hallgrímssonar hjá Barcelona á næsta tímabili.

https://x.com/monfortcarlos/status/1983588175567106113