Arnór Snær Óskarsson var óvænt tilkynntur sem nýr leikmaður Vals á föstudaginn og er hann þar með snúinn heim úr atvinnumennsku og spilar með Val í Olís-deildinni það sem eftir er af tímabilinu. Hann gerði samning við Val út tímabilið og segist stefna aftur út næsta sumar.

,,Ég var að fá lítinn og jafnvel engan spiltíma í Noregi og langaði að fara annað og njóta þess að spila handbolta á nýjan leik," sagði Arnór Snær í samtali við Handkastið.

Arnór þekkir vel til á Hlíðarenda en hann fór frá uppeldisfélaginu í Val árið 2023 þegar hann fór til þýska stórliðsins Rhein Neckar Löwen. Þaðan fór hann á lán til Gummersbach og færði sig síðan til Kolstad í Noregi fyrir ári síðan. Þar hafa tækifærin verið af skornum skammti.

Arnór segist hafa haft úr einhverjum möguleikum að velja en ákvað að velja það að koma heim og í Val.

,,Ég hef verið í samtali við Val í einhvern tíma. Ég var búinn að segja við þá að ég ætlaði að vera áfram í Noregi og taka slaginn áfram með Kolstad og vinna mig aftur inn þar en svo bara á seinustu tveimur vikum fór þetta almennilega í gang," sagði Arnór sem er spenntur fyrir komandi tímum í Val.

,,Ég er mjög spenntur fyrir þessu. Það eru margir ungir góðir leikmenn í bland við reynslu meiri leikmenn. Þetta verður bara mjög skemmtilegt," sagði Arnór sem gæti leikið sinn fyrsta leik með Val á tímabilinu á fimmtudagskvöldið þegar liðið heimsækir Íslands- og bikarmeistara Fram í Úlfarsárdalinn.

,,Markmiðið er að spila vel hérna heima og fara aftur út eftir tímabilið," sagði Arnór að lokum.