Fjögur Íslendingalið áttu leik í Svíþjóð, Danmörku og Noregi í dag en við byrjum í Svíþjóð þar sem kvennalið Sävehof tók á móti Viborg í fyrri leik liðanna í forkeppni Evrópudeildarinnar.

Leiknum lauk með jafntefli 31-31 í hörkuleik og því ekkert sem skilur liðin að þegar þau mætast í Danmörku um næstu helgi. Elín Klara Þorkelsdóttir var eins og svo oft áður á þessu tímabili frábær í liði heimakvenna. Hún skoraði sjö mörk úr níu skotum og var markahæst hjá Sävehof.

Í norsku úrvalsdeildinni skoraði Dagur Gautason fimm mörk úr fimm skotum fyrir lið sitt Arendal sem vann góðan útisigur á Halden, 23-24. Góður sigur hjá gestunum sem fara upp í áttunda sætið sem gefur þátttöku í úrslitakeppnina í Noregi.

Við endum í Danmörku en þar unnu Ribe-Esbjerg öruggan og þægilegan sigur á botnliði Grindsted, 36-24. Elvar Ásgeirsson átti flottan leik fyrir heimamenn en hann skoraði sex mörk úr átta skotum og gaf fimm stoðsendingar. Ágúst Elí Björgvinsson var ekki í leikmannahópnum að þessu sinni.

Jóhannes Berg Andrason skoraði þrjú mörk úr sex skotum fyrir TTH Holstebro sem Arnór Atlason þjálfar en liðið gerði jafntefli, 36-36 í hörkuleik gegn Bjerringbro-Silkeborg á útivelli í kvöld.

Úrslit dagsins:

Sävehof 31-31 Viborg

Halden 23-24 Arendal

Ribe-Esbjerg 36-24 Grindsted

Bjerringbro-Silkeborg 36-36 TTH Holstebro