Fjórir leikir fóru fram í Meistaradeild Evrópu í kvöld þar sem fimm Íslendingar voru í eldlínunni.

Óvæntustu úrslit kvöldsins voru án efa 25-24 sigur Eurofarm Pelister á Pick Szeged. Janus Daði Smárason var ekki með Pick Szeged í kvöld en hann er enn frá vegna meiðsla.

SC Magdeburg unnu fimm marka sigur á HC Zagreb á heimaveilli 27-22. Gísli Þorgeir Kristjánsson skoraði 4 mörk, Ómar Ingi Magnússon skoraði 3 mörk en Elvar Örn Jónsson komst ekki á blað.

Benedikt Gunnar Óskarsson og félagar í Kolstad steinlágu fyrir Bjarka Má Elíssyni og samherjum í Veszprém í Kolstad Arena 29-43. Benedikt Gunnar skoraði 3 mörk fyrir Kolstad en Bjarki Már fór mikinn og var markahæstur á vellinum með 8 mörk fyrir Veszprém.

Þá unnu PSG þriggja marka sigur á GOG í heimsókn þeirra til danska liðsins, 28-31.

Úrslit kvöldsins
A riðill:
Kolstad - Veszprém 29-43

B riðill:
GOG - PSG 28-31
SC Magdeburg - HC Zagreb 27-22
Eurofarm Pelister - Pick Szeged 25-24