Það tók KA einungis fimm sekúndur að skora sitt fyrsta mark í seinni hálfleik í grannaslag KA og Þórs í síðustu viku. Farið var yfir það mark í Handboltahöllinni í gær þar sem þjálfarateymi KA og leikmenn KA var hrósað fyrir útsjónarsemi sína á því augnabliki.

En á sama tíma setti Rakel Dögg Bragadóttir gestur í Handboltahöllinni spurningarmerki við leikmenn Þórs í því tilviki. ,,Hvað voru Þórsarnir að pæla?” sagði Rakel Dögg.

,,Þetta var ótrúlega vel gert hjá KA, allir með á hreinu hvað var mikið eftir af brottvísunni hjá Þórsurum. Þórsarar byrja leikinn hinsvegar og það er eins og þeir hafi ekki hugmynd um að þeir séu manni færri og að KA muni gera áhlaup og reyna að skora á þessum fimm sekúndum. Mér finnst þetta sýna svolítið hvernig seinni hálfleikurinn þróaðist. Mér fannst KA hálfu skrefi framar í seinni hálfleik.”

Það er ekki á hverjum degi sem við sjáum lið skora eftir einungis fimm sekúndur en það ótrúlega mark má sjá hér að neðan.

Þór heimsækir botnlið ÍR heim í Skógarselið í lokaleik 12.umferðarinnar í dag og hefst leikurinn klukkan 18:30. Mikilvægur leikur fyrir bæði lið sem töpuðu bæði leikjum sínum í síðustu umferð.