Aðaltreyja íslenska landsliðsins, árituð af strákunum okkar sem taka þátt á Evrópumótinu sem hefst nú á fimmtudaginn býðst nú á uppboði til styrktar Ljósinu sem er endurhæfingar- og stuðningsmiðstöð fyrir fólk sem hefur fengið krabbamein og aðstandendur þess. 

Ljósið fékk treyjuna að gjöf frá góðgerðarverkefninu Gleðjum Saman sem er í samstarfi m.a. við HSÍ.

Uppboðið stendur til miðvikudagsins 21.janúar klukkan 12:00 en það er daginn eftir lokaleik Íslands í riðlakeppni Evrópumótsins gegn Ungverjalandi en hægt er að skoða uppboðið hér.

,,Við í Ljósinu bíðum spennt eftir því að fylgjast með strákunum okkar úti í Kristianstad í Svíþjóð og hlökkum til komandi leikja á Evrópumeistaramótinu,” segir í tilkynningu frá Ljósinu.

Markmið Ljóssins er að fólk fái sérhæfða endurhæfingu- og stuðning, þar sem fagfólk aðstoðar við að byggja upp líkamlegt og andlegt þrek, auk þess að fá stuðning við að setja sér markmið sem auka daglega virkni og hafa þannig áhrif á lífsgæði almennt.

,,Að lokum viljum við þakka Orra Rafni Sigurðarsyni, sem stendur á bakvið góðgerðarverkefnið Gleðjum saman, fyrir að láta gott af sér leiða og gefa Ljósinu þessar fallegu gjafir.”