Leikstjórnandinn, Benedikt Gunnar Óskarsson er að renna út af samningi við norska úrvalsdeildarfélagið Kolstad eftir tveggja ára dvöl hjá félaginu.

Nú er hinsvegar óljóst hvað verður um Benedikt sem er uppalinn á Hlíðarenda og sló í gegn með Val áður en hann gekk í raðir Kolstad sumarið 2024.

Samkvæmt heimildum Handkastsins er möguleiki að Benedikt komi heim líkt og bróðir hans, Arnór Snær Óskarsson gerði fyrir áramót og lék lykilhlutverk með Val í Olís-deildinni í vetur og var síðan valinn besti leikmaður úrslitakeppninnar eftir að Valur tryggði sér Íslandsmeistaratitilinn.

Valsmenn stefna á þátttöku í Evrópudeildinni á næstu leiktíð og miklar breytingar verða á leikmannahópi liðsins. Sögusagnirnar segja að ef Benedikt Gunnar finnur sér ekki lið sem heillar hann nægilega mikið þá vilji hann frekar koma heim í Val og leika í Evrópudeildinni með sínu uppeldisfélagi.

Það yrði gríðarlegur liðsstyrkur fyrir Val ef Benedikt Gunnar myndi ákveða að snúa aftur heim eftir tvö ár í atvinnumennsku.