Sænski markvörðurinn Niklas Kraft er á leið aftur í sænsku úrvalsdeildina í handbolta eftir að hafa samið við Alingsås HK.

Niklast Kraft snýr því aftur til Alingsås eftir að hafa leikið með liðinu tvö tímabil, árin 2018-2020.

„Ég á mjög margar góðar minningar frá tímanum mínum í Alingsås, bæði innan vallar og utan, svo þetta er mjög ánægjulegt skref. Það eru sex ár síðan ég fór en það var eins og það hefði gerst í gær þegar ég gekk aftur inn í Estrad-höllina. Bæði Mattias Flodman og Dennis Sandberg voru hjá félaginu þegar ég var hér síðast og það eru mörg kunnugleg andlit í kringum liðið,“ sagði Kraft, sem er nú að leita sér að húsnæði fyrir fjölskyldu sína í Alingsås.

Kraft, sem er 32 ára gamall er uppalinn hjá IFK Ystad og hefur leikið með fimm mismunandi liðum á tíu tímabilum í efstu deild. Síðasta félag hans í Svíþjóð var Ystads IF, þar sem hann varð sænskur meistari árið 2022. Alls hefur hann leikið rúmlega 300 leiki í efstu deild Svíþjóðar.

Undanfarin þrjú tímabil hefur hann spilað með danska liðinu Ribe-Esbjerg HH, þar sem hann var meðal annars samherji Íslendinganna Elvars Ásgeirssonar og Ágústs Elís Björgvinssonar en Ágúst Elí og Niklas Kraft voru í harðri samkeppni sem Kraft hafði betur.

Félagið segir í tilkynningu sinni að félagaskiptin hafi meðal annars verið gerð möguleg með auknu fjárframlagi frá stuðningshópnum Club 10.