Þýska úrvalsdeildarfélagið Gummersbach hefur tilkynnt að félagið og franski leikmaðurinn Kentin Mahé hafi komist að samkomulagi um að slíta samstarfi sínu með tafarlausum hætti.

Samningur Mahé við félagið var til sumarsins 2027 en samningurinn hefur nú verið felldur úr gildi með gagnkvæmu samkomulagi.

Hinn 35 ára gamli Mahé sneri aftur til Gummersbach árið 2024 eftir veru hjá ungverska stórliðinu Veszprém. Hann hafði áður leikið með félaginu á árunum 2011 til 2013.

Mahé á glæsilegan feril að baki með franska landsliðinu þar sem hann varð heimsmeistari, Evrópumeistari og Ólympíumeistari.

Guðjón Valur Sigurðsson, þjálfari Gummersbach, segir ákvörðunina hafa verið tekin í sameiningu.

„Mahé er frábær handboltamaður og algjör atvinnumaður. Vegna þeirra gæða sem hann býr yfir á hann skilið meira hlutverk og meiri spilatíma en hann hefur fengið hjá okkur undanfarna mánuði. Þess vegna komumst við sameiginlega að þessari niðurstöðu.“

Framkvæmdastjóri félagsins, Christoph Schindler, þakkaði Mahé fyrir framlag hans til félagsins.

„Það mikilvægasta er að þakka Kenni fyrir framlag hans í treyju Gummersbach. Hann hefur leikið tvisvar fyrir félagið, fyrst sem efnilegur ungur leikmaður og síðar sem reynslumikill leiðtogi. Samband hans við félagið verður því alltaf sérstakt.“

Mahé viðurkennir að síðustu mánuðir hafi verið krefjandi.

„Það er auðvitað ekki einfalt þegar hlutirnir þróast ekki eins og maður hafði vonast eftir, en maður lærir líka af því. Ég er afar þakklátur fyrir þau fjögur ár sem ég hef átt hjá Gummersbach. Þetta hefur verið tími sem einkenndist af gagnkvæmri virðingu og ást á handboltanum.“

Mahé segist að lokum hlakka til að hittast aftur á handboltavöllum Evrópu, sem bendir til þess að hann hyggist halda atvinnumannaferli sínum áfram annars staðar.