Landsliðsþjálfari Færeyja, Daninn Peter Bredsdorff-Larsen segist vonsvikinn eftir að Alþjóðaólympíunefndin (IOC) hafnaði því að Færeyjar fengju að keppa sem sjálfstæð þjóð á Ólympíuleikum. 

Ákvörðunin var tilkynnt aðeins nokkrum dögum eftir að danska þingið hvatti IOC formlega til að viðurkenna bæði Færeyjar og Grænland sem sjálfstæðar ólympíuþjóðir. Alþjóðaólympíunefndin vísaði beiðninni hins vegar á bug og benti á að samkvæmt reglum hennar geti aðeins sjálfstæð ríki, sem njóta alþjóðlegrar viðurkenningar, átt eigin Ólympíunefnd. 

Þar með geta Færeyjar ekki keppt undir eigin fána á Ólympíuleikum, þrátt fyrir að karlalandsliðið eigi raunhæfan möguleika á að tryggja sér þátttökurétt á leikunum með góðum árangri á heimsmeistaramótinu í handbolta í janúar. 

Í dag keppa færeyskir íþróttamenn á Ólympíuleikunum undir dönskum fána.

„Þetta eru auðvitað vonbrigði að þetta skuli ekki vera möguleiki. Það kemur kannski ekki mjög á óvart og við þorðum líklega ekki að vona að þetta myndi gerast fyrir næstu Ólympíuleika, en vonuðum að það gæti orðið að veruleika síðar,“ sagði Bredsdorff-Larsen í samtali við Se & Hør.

Ákvörðunin kemur á sama tíma og færskur handbolti hefur tekið miklum framförum.

Bæði karla og kvennalandslið Færeyja hafa fest sig í sessi meðal sterkari þjóða Evrópu og er færeyska karla landsliðið til að mynda á leið á sitt fyrsta heimsmeistaramót í janúar á næsta ári. Þá hafa yngri landslið Færeyja ítrekað náð framúrskarandi árangri á alþjóðavettvangi.

Þrátt fyrir þann íþróttalega árangur munu færeyskir íþróttamenn áfram aðeins geta tekið þátt á Ólympíuleikum undir fána Danmerkur, þar sem Færeyjar eru hluti af Konungsríki Danmerkur og uppfylla ekki gildandi skilyrði IOC um sjálfstæða ólympíuþjóð.