Haukar eru í níunda sæti á styrkleikalista handboltamiðilsins Handball Planet yfir þau sextán lið sem miðillinn telur sigurstranglegust í Evrópubikar karla á þessu tímabili.

Hafnarfjarðarliðið er meðal annars fyrir ofan gríska stórliðið AEK Aþenu, sem varð Evrópubikarmeistari árið 2021 og lék til úrslita í keppninni árið 2025. Haukar eru einnig fyrir ofan slóvenska liðið Gorenje Velenje og pólska liðið Ostrovia Ostrów Wielkopolski.

Makedónska liðið Ohrid er í efsta sæti listans en liðið varð Evrópubikarmeistari á síðasta tímabili eftir sigur gegn ungverska liðinu Tatabánya í úrslitum.

Haukar hefja leik í Evrópubikarnum um helgina þegar Esch frá Lúxemborg kemur til Íslands og fara báðir leikirnir fram á Ásvöllum um helgina.

Annað makedónskt lið, Alkaloid, er í öðru sæti en liðið varð Evrópubikarmeistari árið 2025. Gríska stórliðið Olympiacos er í þriðja sæti, en það tapaði eftirminnilega gegn Val í úrslitum Evrópubikarsins árið 2024. Úlfar Páll Monsi Þórðarson leikur með Alakloid.

Tyrkneska stórliðið Besiktas er í fjórða sæti og norska liðið Runar Sandefjord í því fimmta.

Haukar komust í átta liða úrslit Evrópubikarsins á síðasta tímabili og hafa byrjað núverandi tímabil af miklum krafti hér heima. Liðið hefur unnið alla sex leiki sína í Olís-deild karla og situr á toppi deildarinnar.

Tíu efstu lið styrkleikalistans:

1. Ohrid (Norður-Makedónía)
2. Alkaloid (Norður-Makedónía)
3. Olympiacos (Grikkland)
4. Besiktas (Tyrkland)
5. Runar Sandefjord (Noregur)
6. Trimo Trebnje (Slóvenía)
7. Vojvodina (Serbía)
8. Nærbø (Noregur)
9. Haukar (Ísland)
10. AEK Aþena (Grikkland)