Við heyrðum aðeins í handknattleiksmanninum Degi Sverri Kristjánssyni, sem leikið hefur í Svíþjóð undanfarin 3 ár. Fyrst með Karlskrona í 2 ár og svo núna síðasta árið með Vinslövs HK í næstefstu deild.

Dagur Sverrir er fæddur árið 2000 og leikur sem örfhent skytta. Ólst hann upp í Breiðholtinu og lék með ÍR alla tíð áður en hann fór út til Svíþjóðar. Tímabilið 2022-2023 var hans síðasta tímabil áður en hann flutti búferlum til Svíþjóðar og átti hann frábært tímabil í Olís deildinni þar sem hann skoraði 115 mörk í 22 leikjum.

Gefum Degi orðið og leyfum honum að segja aðeins frá árunum þrem í Svíaríki og hvað sé í pípunum framundan hjá honum og fjölskyldunni.

"Ég flutti út til Svíþjóðar 2023 með kærustunni til að spila með HF Karlskrona sem voru þá að koma upp í efstu deild. Handbollsligan er hörku deild með mikið af góðum liðum og leikmönnum. Við vorum í íbúð í miðbænum og leið okkur mjög vel 2 árin í Karlskrona. Mjög flott aðstaða og professional umhverfi hjá liðinu. Ný höll og í kringum 1500-2000 manns á öllum leikjum. Það var líka geggjað að hafa Óla, Ogga og Phil þarna. Ég var nýútskrifaður með BS í viðskiptafræði þegar ég flutti út og er búinn að vera í 50% vinnu í fjármáladeild með handboltanum"

"Fyrsta árið okkar enduðum við í neðra playoffsi en vinnum það 3-0. Og seinna árið enduðum við í 4. sæti í deildinni sem er held ég besti árangur í sögu félagsins. Ég var nr. 2 í hægri skyttunni allan tímann og nr. 2 í horninu líka fyrsta tímabilið þar sem annar hornamaðurinn meiddist snemma á tímabilinu. Ég spilaði mikið en sat líka mikið á bekknum. Ég lenti í erfiðum axlarmeiðslum fyrsta tímabilið og síðan fékk ég hjartabólgur á öðru tímabili sem var ömurlegt og setti smá strik í reikninginn þegar kom að spiltíma"

"Eftir það var planið að flytja heim en það var haft samband við mig frá Vinslöv HK en þeir eru í næstefstu deild og þeir vildu mikið fá mig. Þeir enduðu í 3. sæti árið áður og markmiðið var að komast upp núna í ár og spila í efstu deild á næsta ári. Þannig að ég ákvað að prófa þetta og flutti til Kristianstad með kærustunni minni og dóttur sem fæddist í apríl á síðasta ári. Þar var tekið vel á móti okkur af Óla Guðmunds og Tinnu en heima hjá þeim eru svokallaðar höfuðstöðvar Íslendinga í Kristianstad. En Vinslöv sem er 20mín frá Kristianstad er lítill bær þar sem er mikill áhugi fyrir handbolta og vel mætt á leiki. Allsvenskan er áhugaverð deild minna um taktík og mjög mikið maður á mann og mikið spilað 7-6 og framliggjandi varnir. Það ævintýri er ekki búið að ganga nógu vel, þjálfarinn sem fékk mig var rekinn í byrjun tímabils og sá sem kom í staðinn er ekki mikið að rótera liðinu. Hinn örvhenti leikmaðurinn sem kom frá Runar í Noregi fyrir tímabilið spilar flestar mínútur. Þetta er búið að vera frábær lífsreynsla en maður er í þessu til að spila þannig planið núna er að flytja heim í sumar"

Það verður áhugavert að sjá hvaða félagi Dagur Sverrir endar. Og eins frábært að fá hann í Olís deildina á nýjan leik. Það er nokkuð ljóst að hann fær án efa nokkur símtöl eftir þessa frétt.