Janus Daði Smárason var nú í morgun kynntur sem leikmaður Barcelona frá og með næsta sumri. Janus Daði gengur í raðir Barcelona frá ungverska stórliðinu Pick Szeged.

Janus Daði gerir þriggja ára samning við Barcelona sem gildir til sumarsins 2029.

Janus Daði hefur víða komið við á ferlinum en það hefur lengi legið fyrir að Janus Daði yrði leikmaður Barcelona frá og með sumrinu en hann sást í Barcelona fyrr á þessu tímabili með forráðamönnum félagsins.

Janus Daði verður þar með liðsfélagi Viktors Gísla Hallgrímssonar sem er á sínu fyrsta tímabili hjá spænska félaginu. Janus sem er uppalinn hjá Selfossi gekk ungur að árum í raðir Hauka þar sem hann sló heldur betur í gegn í Olís-deildinni.

Þaðan fór hann síðan til Álaborg og Göppingen þangað til hann gekk í raðir Kolstad í Noregi. Vegna fjárhagsvandræða félagsins var dvöl hans hjá Kolstad styttri en gert var ráð fyrir og gekk hann í raðir Magdeburg í kjölfarið þar sem hann var í eitt tímabil. Hann er nú á sínu öðru tímabili með Pick Szeged í Ungverjalandi.

Janus Daði verður fimmti íslenski handknattleiksmaðurinn sem leikur fyrir Barcelona en Viggó Sigurðsson var sá fyrsti í sögunni. Guðjón Valur Sigurðsson var sá annar og Aron Pálmarsson sá þriðji.