Íslenska kvennalandsliðið tryggði sér sæti á Evrópumótinu sem fram fer í desember eftir frábæra frammistöðu í seinni hálfleik í sigri liðsins gegn Portúgal fyrir framan troðfulla stúku á Ásvöllum. Þar með er ljóst að Ísland leikur á sínu fjórða stórmóti í röð og á leiðinni á sitt sjöunda stórmót í sögunni.

Þetta varð ljóst eftir frábæran sigur liðsins gegn Portúgal á Ásvöllum í dag 32-24.

Fyrir leikinn var vitað að um væri að ræða úrslitaleik fyrir báðar þjóðir um laust sæti á Evrópumótinu en íslenska liðið var einungis með tvö stig í riðlinum fyrir leikinn í kvöld sem var sá síðasti í undankeppninni. 

Leikurinn byrjaði ekki vel fyrir íslenska landsliðið sem lenti strax 1-5 undir í upphafi leiks og var lengi vel að elta gestina frá Portúgal sem voru þremur mörkum yfir 10-7 eftir 20 mínútna leik. 

Íslenska liðið fór illa með góð færi og þá tapaði liðið mörgum boltum sem hjálpi þeim ekki í eltingarleiknum. 

Í stöðunni 12-10 fyrir Portúgal tók Arnar Pétursson þá ákvörðun að skipta úr 6-0 vörn í 5-1 vörn sem hafði slæm áhrif á sóknarleik Portúgals og íslenska liðið gekk á lagið og hvert hraðarupphlaupsmarkið á fætur öðru leit dagsins ljós.

Íslenska liðið skoraði fimm síðustu mörk fyrri hálfleiksins og fór með óvænta en kærkomna þriggja marka foyrstu inn í hálfleikinn í stöðunni 15-12.

Með Hafdísi Renötudóttur í góðum gír í markinu hélt íslenska liðinu Portúgal í þægilegri fjarlægð allan leikinn og jók forskotið þegar leið á leikinn. Tíu mínútum fyrir leikslok náði íslenska liðið tíu marka forystu í fyrsta sinn í leiknum. Eftir það var aldrei spurning hvar sigurinn myndi lenda.

Lokatölur urðu síðan 32-24 Íslandi í vil en Hafdís Renötudóttir varði hvorki fleiri né færri en 15 skot í markinu með 45% markvörslu. Elín Klara Þorkelsdóttir var markahæst í íslenska liðinu með sjö mörk og Elín Rósa Magnúsdóttir skoraði sex. Sandra Erlingsdóttir, Katrín Anna Ásmundsdóttir og Rakel Oddný Guðmundsdóttir skoruðu fjögur mörk hver.

Tölfræði leiksins má sjá hér.