Franska línumanninum Sarah Bouktit og danska landsliðsmarkverðinum Emil Nielsen voru í dag veitt MVP-verðlaun Evrópska handknattleikssambandsins (EHF) sem bestu leikmenn tímabilsins 2025/26.

Við sama tilefni voru þau Lylou Borg og Francisco „Kiko“ Costa valin efnilegustu leikmenn ársins. 

Bouktit, sem leikur með Metz Handball, átti stóran þátt í því að félagið vann Meistaradeild Evrópu í fyrsta sinn í sögu félagsins. Hún skoraði 20 mörk í úrslitahelginni og varð næstmarkahæst í keppninni á tímabilinu. Þá var hún valin í stjörnulið heimsmeistaramótsins í desember eftir að hafa leitt Frakkland til bronsverðlauna. 

Emil Nielsen, markvörður Barcelona og danska landsliðsins, hlaut verðlaunin í annað sinn á ferlinum, en hann var einnig valinn verðmætasti leikmaðurinn árið 2024. Nielsen varð Evrópumeistari með Danmörku fyrr á árinu og átti lykilþátt í sigri Barcelona í Meistaradeild Evrópu. Hann er jafnframt eini karl leikmaðurinn sem nú er ríkjandi Evrópu-, heims- og Ólympíumeistari auk þess að vera Evrópumeistari félagsliða. 

Í flokki efnilegustu leikmanna ársins varð Lylou Borg, miðjumaður Metz og franska landsliðsins, hlutskörpust hjá konunum. Borg gekk til liðs við Metz fyrir tímabilið og festi sig fljótt í sessi sem lykilleikmaður á leið liðsins til Evrópumeistaratitils. 

Portúgalska hægri skyttan Francisco „Kiko“ Costa, sem leikur með Sporting, var valinn efnilegasti karl leikmaður tímabilsins. Costa skoraði 136 mörk í Meistaradeildinni, næstflest allra leikmanna og var einnig valinn efnilegasti leikmaður Evrópumóts karla 2026, þar sem hann hlaut einnig sæti í úrvalsliði mótsins. 

Verðlaunin fyrir efnilegustu leikmennina eru veitt leikmönnum sem eru 21 árs eða yngri.