Patrick Groetzki hefur skrifað nafn sitt í sögubækur þýsku Bundesligunnar. Fyrrverandi hornamaður Rhein-Neckar Löwen er nú sá leikmaður sem hefur unnið flest stig fyrir eitt og sama félagið í sögu deildarinnar.

Groetzki lék 582 Bundesliguleiki fyrir Rhein-Neckar Löwen og tók þátt í að vinna 827 stig á þeim tíma. Það er 44 stigum meira en Volker Zerbe vann með TBV Lemgo.

Danskar handboltagoðsagnir skipa næstu sæti á listanum. Lasse Svan er í þriðja sæti með 723 stig í 452 leikjum fyrir Flensburg, en Lars Christiansen er fjórði með 700 stig í 457 leikjum fyrir sama félag.

Þrír leikmenn frá THW Kiel og þrír frá Flensburg eru á meðal tíu efstu á listanum, sem undirstrikar yfirburði félaganna í þýskum handbolta í gegnum árin. Enginn Íslendingur er hinsvegar á listanum.

Tíu efstu á listanum:

1. Patrick Groetzki (Rhein-Neckar Löwen) – 827 stig
2. Volker Zerbe (TBV Lemgo) – 783 stig
3. Lasse Svan (Flensburg) – 723 stig
4. Lars Christiansen (Flensburg) – 700 stig
5. Christian Zeitz (THW Kiel) – 692 stig
6. Florian Kehrmann (TBV Lemgo) – 675 stig
7. Patrick Wiencek (THW Kiel) – 668 stig
8. Jan Holpert (Flensburg) – 654 stig
9. Niclas Ekberg (THW Kiel) – 646 stig
10. Steffen Stiebler (SC Magdeburg) – 644 stig