Það styttist og styttist í komandi tímabil í Olís-deildum karla og kvenna. Olís-deild karla hefst fimmtudaginn 3.september á meðan Olís-deild kvenna hefst laugardaginn 5.september.

Handkastið heldur áfram að hita upp fyrir Olís-deildirnar og hefur sent sömu tíu spurningarnar á alla þjálfara deildarinnar í karla og kvenna flokki.

Nú er komið að því að sjá hvað þjálfari Þórs í Olís-deild kvenna Daniel Birkelund hefur að segja.

Ertu ánægður með hvernig undirbúningstímabilið hefur gengið?

Já, heilt yfir. Það hefur verið langt. En það er bara svona ef maður kemst ekki í úrslitakeppnina og lýkur tímabilinu mjög snemma. En mér finnst við hafa nýtt tímann ágætlega frá því við hófum æfingar aftur 20. apríl.

Hverjar hafa verið helstu áherslur liðsins á undirbúningstímabilinu?

Í apríl, maí, júní og júlí lögðum við mikla áherslu á að bæta líkamlegt ástand leikmanna og byggja upp sterkari grunn hvað varðar styrk og líkamlegt úthald. Í júlí og ágúst hefur áherslan svo að sjálfsögðu verið mikið á að koma nýju leikmönnunum inn í liðið og móta okkar hugmyndafræði, bæði innan vallar og utan, fyrir komandi tímabil.

Hvernig metur þú stöðuna á leikmannahópnum þegar styttist í mót?

Þegar keppnistímabilið nálgast held ég að maður sé aldrei 100% viss um neitt. En mér finnst staðan vera ágæt. Ég held að við séum tilbúnir að berjast um stig frá fyrsta leik.

Hvernig metur þú þær breytingar sem hafa orðið á leikmannahópnum í sumar?

Ég held að við séum greinilega með breiðari hóp núna, sérstaklega í skyttustöðunum. Það gefur okkur fleiri möguleika og gerir okkur kleift að rótera meira. Mér finnst nýju leikmennirnir okkar einnig hafa bætt við auknum gæðum og komið með ferskar hugmyndir. Ég er líka mjög ánægður með okkar yngri leikmenn sem eru nú orðnir samþættur hluti af meistaraflokksstarfinu. Þeir koma með aukinn metnað og orku inn í hópinn og það hefur einnig verið mjög jákvætt.

Hverjar telur þú vera helstu áskoranirnar fyrir þig og liðið í vetur?

Að vera stöðugir heilt tímabil. Við erum lítið félag og lítil umgjörð. Úrræðin, í víðum skilningi, eru takmörkuð og aðstæður til að ná framúrskarandi árangri eru ekki alltaf til staðar. Þetta er kannski ekki eitthvað sem maður tekur endilega eftir frá einni viku til annarrar, en oft eru það einmitt þessir hlutir sem gera gæfumuninn þegar heilt tímabil er skoðað.

Allir eru að gera sitt besta og við leggjum hart að okkur til að halda áfram að þróa starfið. Mér finnst okkur fara hægt en örugglega fram. En það eru mörg svið þar sem við eigum enn langt í land. Við sjáum svo bara hversu langt við komumst og hversu hratt við komumst þangað.

Hverjar eru væntingar þínar til komandi tímabils?

Ég býst við að við höldum áfram á þeirri braut stöðugra framfara sem mér finnst við hafa verið á síðan á síðasta tímabili, þar sem við urðum betri eftir því sem leið á tímabilið, og tökum skýrt skref fram á við. Allt annað en að komast í úrslitakeppnina í vetur yrðu vonbrigði fyrir okkur.

Hverju ert þú spenntastur fyrir þegar nýtt tímabil er að hefjast?

Ég hlakka einfaldlega til að byrja! Við spiluðum síðast keppnisleik í byrjun mars!

Ef þú mættir velja einn leikmann úr öðru liði deildarinnar til að fá í þinn hóp, hvern myndir þú velja og af hverju?

Ég held að það séu margir frábærir handknattleiksmenn í deildinni, margir sem væri gaman að þjálfa og gætu bætt einhverju við okkar hóp. En ef ég mætti velja hvernig sem er, þá myndi ég, þar sem við erum aðeins þunnskipaðir í línumannastöðunni, velja Jón Bjarka Ólafsson hjá FH.

Mér finnst hann vera línumaður í hæsta gæðaflokki sem myndi smellpassa við þá leikmenn sem við erum þegar með.

Ef þú mættir breyta einni reglu í handboltanum, hver yrði breytingin?

Ég myndi vilja sjá alvöru tilraun með þriggja dómara kerfi.

Hvaða lið telur þú að verði deildarmeistari í vetur?

Leiðinlegt svar... en ég held að Valur hljóti að bera „favorite“ stimpilinn. FH og Haukar líta einnig vel út og munu líklega veita Val harða keppni. Fyrir utan þessi lið finnst mér hins vegar deildin mjög opin. Þar er stór hópur liða sem, með góðu tímabili gæti barist um þriðja eða fjórða sætið en með slæmu tímabili gæti endað utan úrslitakeppnina.

Sjá einnig:

Viðtal við þjálfara kvennaliðs Gróttu
Viðtal við þjálfara karlaliðs ÍBV
Viðtal við þjálfara karlaliðs Selfoss
Viðtal við þjálfara karlaliðs Aftureldingar