Litháinn Gintaras Savukynas, fyrrverandi leikmaður Gróttu/KR og Aftureldingar og fyrrum þjálfari ÍBV, hefur þurft að stíga til hliðar sem þjálfari norska úrvalsdeildarliðsins Bergsøy vegna alvarlegra veikinda. Félagið greindi frá þessu í tilkynningu á samfélagsmiðlum.

Gintaras, sem er 55 ára gamall, tók við þjálfun Bergsøy í sumar en hefur nú verið settur í fullt veikindaleyfi um óákveðinn tíma.

„Aðalþjálfari okkar, Gintaras Savukynas, er sem stendur í 100% veikindaleyfi vegna alvarlegra veikinda. Það mikilvægasta fyrir Bergsøy Handball núna er að Gintaras fái þann tíma og þá ró sem hann þarf til að ná heilsu," segir í tilkynningu Bergsøy.

Í stað Gintaras kemur Peter Pucelj, fyrrverandi þjálfari Bergsøy og tekur tímabundið við þjálfun liðsins.

Gintaras er íslenskum handboltaáhugamönnum að góðu kunnur en hann lék með Aftureldingu á árunum 1998 til 2001 og var einn af lykilmönnum liðsins á gullaldartímabili þess.

Á sínu fyrsta tímabili með Aftureldingu varð hann þrefaldur meistari þegar Mosfellingar unnu Íslands-, deildar- og bikarmeistaratitilinn tímabilið 1998/99.

Hann lék einnig með Gróttu/KR hér á landi áður en hann sneri sér að þjálfun.

Gintaras þjálfaði ÍBV á sínum tíma og kom liðinu meðal annars upp í efstu deild. Hann var einnig valinn þjálfari ársins í næstefstu deild. Litháinn hefur síðan átt langan og farsælan þjálfaraferil víða um Evrópu. Hann hefur meðal annars þjálfað Motor Zaporizhzhia í Úkraínu, Riihimäen Cocks í Finnlandi og Meshkov Brest í Hvíta-Rússlandi.

Hann er jafnframt landsliðsþjálfari Litháens en hann tók við landsliðinu á ný árið 2022. Gintaras þjálfaði Bergsøy áður á árunum 2013 til 2016 og sneri aftur til félagsins í sumar eftir tíu ára fjarveru. Bergsøy hefur ekki gefið frekari upplýsingar um veikindin eða hvenær Gintaras gæti snúið aftur til starfa.