Guðjón Valur Sigurðsson, þjálfari þýska úrvalsdeildarliðsins VfL Gummersbach, verður án sænsku stórskyttunnar Nikola Roganović næstu vikurnar vegna meiðsla.

Þetta kemur fram í frétt þýska handboltamiðilsins handball-world.news.

Roganović, sem er tvítugur, hefur verið einn mikilvægasti sóknarmaður Gummersbach á tímabilinu og er markahæsti leikmaður félagsins í þýsku Bundesligunni. Svíinn hefur skorað 72 mörk í fyrstu níu deildarleikjum Gummersbach, eða átta mörk að meðaltali í leik.

Meiðslin koma á afar óheppilegum tíma fyrir Guðjón Val og félaga, sem unnu frábæran 31-30 sigur gegn toppliði Flensburg um síðustu helgi.

Roganović fór á kostum í þeim leik og skoraði tólf mörk þegar Gummersbach varð fyrst liða til að leggja Flensburg að velli í þýsku Bundesligunni á tímabilinu. Hann hefur vakið mikla athygli síðan hann gekk til liðs við Gummersbach frá sænska félaginu HK Malmö í sumar. Meðal annars skoraði hann fimmtán mörk í 31-31 jafntefli gegn Melsungen fyrr á tímabilinu.

Gummersbach hefur átt misjöfnu gengi að fagna í upphafi tímabilsins en liðið er með tólf stig eftir tíu deildarleiki og situr í sjöunda sæti.

Þrír Íslendingar leika með Gummersbach, þeir Elliði Snær Viðarsson, Teitur Örn Einarsson og Garðar Ingi Sindrason.

Gummersbach hafði betur gegn Göppingen í gær, 26-33 þar sem Elliði Snær skoraði fimm mörk.