Línumaðurinn og varnarjaxlinn, Ágúst Birgisson hefur ákveðið að taka eitt ár í viðbót með liði FH í Olís-deild karla. Þetta tilkynnti FH á samfélagsmiðlum sínum nú rétt í þessu.

,,One more year, takk! Ágúst Birgisson tekur slaginn," segir í tilkynningunni frá FH.

Fyrir mánuði síðan sagði Ágúst Birgisson í samtali við Handkastið að skórnir væru komna til hliðar.

Ágúst hefur leikið með FH síðustu níu og hálft tímabil eða frá janúar árið 2016 er hann gekk í raðir FH á miðju tímabili frá Aftureldingu. Hann varð Íslandsmeistari með FH tímabilið 2023/2024.

Þetta eru risa stór tíðindi fyrir FH-inga sem í síðustu viku fengu til sín Birki Benediktsson frá Japan.