Sænski landsliðsmarkvörðurinn Andreas Palicka gekk til liðs við Füchse Berlin í sumar og er félagið það fjórða sem hann leikur með í Þýskalandi á löngum ferli. Það var þó ekki aðeins Palicka sjálfur sem gladdist yfir félagaskiptunum því 13 ára sonur hans hafði sérstaka ástæðu til að fagna.

Palicka fór fyrst frá Svíþjóð árið 2008 þegar hann gekk til liðs við THW Kiel eftir að hafa leikið með H43 Lund og Redbergslids IK.

Síðan þá hefur hann komið víða við og leikið með Aalborg, Rhein-Neckar Löwen, Paris Saint-Germain, Kolstad og síðast HSG Wetzlar áður en Füchse Berlin varð næsti áfangastaður.

Bob Hanning, framkvæmdastjóri Füchse Berlin, segir að félagaskipti milli landa snúist um mun meira en eingöngu handboltann, jafnvel hjá jafn reynslumiklum leikmanni og Palicka.

„Jafnvel fyrir leikmann með hans reynslu er þetta alltaf nýtt upphaf og ný áskorun. Það var ljóst frá byrjun að fjölskyldan myndi koma með honum til Berlínar eftir að hann hafði þurft að ferðast á milli Wetzlar og Noregs síðasta hálfa árið. Það er ekki langtímalausn,“ sagði Hanning.

Hann bendir á að fjölskyldan þurfi meðal annars að takast á við nýjan skóla, nýja vini og nýtt daglegt líf.

Börn Palicka, Aston, 13 ára, og Elsa, 10 ára, voru hins vegar hæstánægð þegar þau fréttu hvert ferðinni væri heitið.

Sérstaklega vakti viðbragð Aston athygli Hannings.

„Þegar Andreas sagði honum frá flutningnum til Berlínar voru fyrstu viðbrögðin: ‚Ó, frábært, þá get ég spilað með Füchse,‘“ sagði Hanning.

Fyrir framkvæmdastjórann segir það mikið um stöðu félagsins þegar ungur handboltamaður tengir sig með þessum hætti við Füchse Berlin.

„Þegar 13 ára strákur gleðst yfir félagaskiptum vegna þess að hann vill sjálfur svo mikið verða hluti af þessu félagi, þá er það fyrir mér eitt fallegasta hrós sem félag getur fengið.“

Palicka og fjölskylda hefja því nýjan kafla í Berlín en fyrir sænska markvörðinn er þetta langt frá því að vera fyrsta reynslan af þýskum handbolta eftir fyrri veru hjá Kiel, Rhein-Neckar Löwen og Wetzlar.