Mathias Gidsel, ein stærsta stjarna danska handboltalandsliðsins, hefur viðrað þá hugmynd að landslið karla leiki fleiri heimaleiki utan hefðbundinna leikstaða. Hugmynd hans um að færa landsleiki til Suður-Jótlands hefur vakið töluverða athygli en skoðanir Dana eru skiptar.

Mathias Gidsel, sem hefur verið valinn besti handboltamaður heims þrjú ár í röð, ræddi á þriðjudaginn möguleikann á að færa landsliðshandboltann nær fólki víðar um Danmörku.

Hann nefndi meðal annars bæinn Aabenraa á Suður-Jótlandi sem mögulegan leikstað, til dæmis í tengslum við lokamót stórmóta.

Enn sem komið er er þetta aðeins hugmynd frá Gidsel en samkvæmt danska miðlinum tvSyd hefur hún þegar skapað töluverðar umræður meðal íbúa á Suður-Jótlandi.

Margir íbúar svæðisins hafa tekið hugmyndinni fagnandi og lýst yfir áhuga á að fá danska landsliðið í heimsókn.

„Það væri SVO geggjað ef maður fengi tækifæri til að sjá þá spila á Suður-Jótlandi,“ skrifaði einn íbúi á Facebook.

Annar tók undir hugmyndina og nefndi fleiri mögulega leikstaði.

„Þetta er rétt hjá þér, Mathias. Þú stendur með báða fætur á jörðinni. Það væri frábært ef þið mynduð spila leik í Aabenraa, Skærbæk eða Tønder.“

Ekki eru þó allir jafn hrifnir af hugmyndinni.

Fyrir marga Dani er heimavöllur landsliðsins nátengdur Jyske Bank Boxen í Herning þar sem þúsundir áhorfenda hafa fylgst með stórleikjum danska landsliðsins í gegnum árin.

„Góð hugmynd hjá Mathias! En handboltinn á heima í Boxen í Herning,“ skrifaði einn í umræðunum.

Aðrir hafa einnig velt því fyrir sér hvort íþróttahús á Suður-Jótlandi uppfylli þær kröfur sem gerðar eru til alþjóðlegra landsleikja.

Hugmynd Gidsel hefur því fengið bæði jákvæðar og neikvæðar undirtektir, en ljóst er að margir íbúar Suður-Jótlands myndu fagna því að fá að sjá danska landsliðið spila nær heimabyggð sinni.