Næst síðasta umferð í riðlakeppni Meistaradeildar kvenna bauð upp á stórtíðindi. Esbjerg vann sinn fyrsta sigur á Györ frá upphafi og heldur þar með í vonina um beint sæti í átta liða úrslitum, á meðan Metz tryggði sér sæti í topp átta.

Í B-riðli er staðan hins vegar gjörsamlega galopin. Örfáum stigum munar á fimm liðum fyrir lokaumferðina eftir sigra Brest, CSM og Odense – og allt bendir til þess að baráttan ráðist ekki fyrr en í síðustu mínútunum á lokadeginum.

Úrslit helgarinnar

A-riðill

Esbjerg - Györ 33-18 (21-10)
Markahæstar: Nora Mørk 13/16 – Bruna de Paula 7/12
Esbjerg lagði grunninn að sögulegum sigri með frábærum fyrri hálfleik þar sem liðið lék nær óaðfinnanlega bæði í vörn og sókn. Mørk skoraði átta mörk fyrir hlé og markvörðurinn Anna Kristensen varði nær helming skota sem á hana komu.
Györ náði að laga leik sinn eftir hlé og minnka muninn um stund, en Esbjerg hélt stjórninni með sterkri frammistöðu Mørk og Henny Reistad. Sigurinn heldur dönsku meisturunum inni í baráttunni um beint sæti í átta liða úrslitum.

Dortmund - Metz 24-33 (12-15)
Markahæstar: Kelly Vollebregt 6/9 – Léna Grandveau 8/10
Metz byrjaði leikinn af krafti og náði snemma góðri forystu, en Dortmund hélt sér inni í leiknum fram í seinni hálfleik. Þegar jafnt var um miðjan síðari hálfleik skiptu Frakkarnir hins vegar um gír.
Dortmund skoraði aðeins þrjú mörk á lokakaflanum á meðan Metz refsaði fyrir mistök og tryggði sér öruggan sigur – og þar með beint sæti í átta liða úrslitum.

Buducnost - Storhamar 22-26 (10-16)
Markahæstar: Nikolina Markovic 5/8 – Anniken Obaidli 7/13
Storhamar mættu ákveðnar til leiks og náðu snemma góðri forystu, meðal annars þökk sé öflugri markvörslu Eli Marie Raasok. Buducnost reyndi að vinna sig aftur inn í leikinn eftir hlé en Norðmenn héldu haus og kláruðu mikilvægan sigur.
Sigurinn heldur vonum Storhamar um sæti í umspili á lífi fyrir lokaumferðina.

Gloria Bistrita - DVSC 32-31 (17-17)
Markahæstar: Danila So Delgado 8/10 – Alicia Toublanc 6/11
Leikurinn var jafn og spennandi frá upphafi til enda. Bistrita náði þriggja marka forskoti í seinni hálfleik, en DVSC jafnaði og fékk tækifæri til að komast yfir á lokamínútunum.
Heimakonur héldu hins vegar haus og tryggðu sér sigurinn – sem þýðir að Bistrita endar í fjórða sæti riðilsins.

B-riðill

Brest - Sola 36-25 (19-12)
Markahæstar: Ana Gros 7/11, Pauletta Foppa 7/8 – Camilla Herrem 4/8
Eftir jafna byrjun tók Brest leikinn yfir með öflugri vörn og frábærri markvörslu Floriane André. Munurinn jókst jafnt og þétt og sigurinn var aldrei í hættu í seinni hálfleik.
Franska liðið styrkti þar með stöðu sína í toppbaráttu riðilsins.

FTC - CSM Búkaresti 30-35 (15-17)
Markahæstar: Daria Dmitrieva 9/13 – Trine Jensen Østergaard 6/6,
CSM náði frumkvæðinu snemma og nýtti sér mistök heimaliðsins vel. FTC jafnaði um miðjan fyrri hálfleik en rúmenska liðið tók yfir í seinni hálfleik og náði afgerandi forskoti.
Sterk markvarsla Gabrielu Moreschi og breidd í sókninni tryggði CSM sjöunda sigurinn í röð og setti liðið í sterka stöðu fyrir lokaumferðina.

Podravka - Krim 24-23 (15-11)
Markahæstar: Sara Senvald 4/4, Tina Barisic 4/8 – Tamara Mavsar 7/8
Í hreinum úrslitaleik um umspilssæti byrjaði Podravka betur og leiddi mestallan tímann. Krim náði að jafna í seinni hálfleik, en heimakonur héldu betur í lokin.
Markvarsla Luciju Besen á lokasekúndunum tryggði Podravka sigurinn – og sæti í umspilinu.

Ikast - Odense 30-33 (16-14)
Markahæstar: Julie Scaglione 9/15 – Helene Fauske 5/12, Elma Halilcevic 5/6
Ikast var skrefinu á undan í fyrri hálfleik, en Odense sneri leiknum við fljótlega í seinni hálfleik. Lokakaflinn reyndist afgerandi þegar Odense skoraði sex mörk í röð og náði öruggri forystu.
Sigurinn lyftir Odense upp í annað sæti og þýðir að fimm lið eru nú innan fjögurra stiga fyrir lokaumferðina.