Johannes Golla verður áfram fyrirliði þýska landsliðsins í handbolta á heimsmeistaramótinu sem fram fer á heimavelli í janúar. Þýska handknattleikssambandið (DHB) hefur staðfest að Golla njóti áfram stuðnings sambandsins þrátt fyrir erfiða stöðu hans hjá MT Melsungen.

Ingo Meckes, íþróttastjóri þýska handknattleikssambandsins, staðfesti þetta í samtali við þýsku fréttastofuna DPA.

„Johannes Golla er fyrirliði karlalandsliðsins okkar og hefur leitt liðið með framúrskarandi hætti, bæði innan vallar sem utan, frá því hann tók við hlutverkinu. Hann mun halda áfram að sinna þessu hlutverki með sínum venjulega hætti í aðdraganda heimsmeistaramótsins á heimavelli í janúar og á mótinu sjálfu,“ sagði Meckes.

Golla, sem er 28 ára gamall, hefur verið fyrirliði þýska landsliðsins frá nóvember 2021.

Golla hefur verið mikið í umræðunni að undanförnu eftir að hann lýsti yfir vilja sínum til að yfirgefa MT Melsungen og snúa aftur til SG Flensburg-Handewitt.

Í færslu á Instagram lýsti Golla því hversu erfið breytingin hefði reynst honum eftir átta ár hjá Flensburg.

„Að skilja eftir allan heiminn okkar, sem við byggðum upp á átta árum við fjörðinn, hefur reynst erfitt. Jafnvel fólk sem þekkir mig vel hefur lengi séð að mér líður ekki vel og að þetta er ekki lengur bara heimþrá, heldur er andleg heilsa mín í alvarlegri hættu,“ skrifaði Golla.

Áður en heimsmeistaramótið hefst í janúar eiga Þjóðverjar tvo leiki framundan í undankeppni Evrópumótsins.

Þýskaland tekur á móti Belgíu í Berlín 5. nóvember áður en liðið heimsækir Slóvakíu þremur dögum síðar.

Alfreð Gíslason hefur valið 18 manna hóp fyrir leikina og þar eru tveir nýliðar, vinstri hornamaðurinn David Móré frá ThSV Eisenach og skyttan Niklas Theiß frá HSG Wetzlar.

„Við vinnum með kjarnahóp leikmanna sem þekkja vinnubrögðin og hafa náð góðri samhæfingu. Við höfum hins vegar einnig lagt áherslu á að fylgjast með nokkrum leikmönnum og frammistöðu þeirra í ákveðnum stöðum,“ sagði Alfreð.