Stymmi Klippari mun í allan vetur spá í spilin og tippa á hvernig komandi umferð mun fara í Olís deildum karla og kvenna.

Hér að neðan má sjá hvernig hann telur að 7.umferð fari í Olís deild kvenna.

ÍR – Selfoss (Fimmtudagur 19:30)  /  Sigurvegari: ÍR

ÍR búnar að tapa tveim leikjum í röð gegn toppliðum deildinnar eftir góða byrjun á tímabilinu. Selfoss komst loksins á sigurbraut í síðustu umferð aftur eftir góðan sigur á HK. ÍR mun hins vegar sýna styrk sinn í kvöld og vinna sinn fimmta leik á tímabilinu.

Fram – Haukar (Fimmtudagur 20:00)  /  Sigurvegari: Haukar

Fram hafa tapað tveim leikjum í röð gegn Val og ÍBV. Þær eru eflaust hundsvekktar með þessi töp þar sem þær sýndu ekki sitt rétta andlit. Haukarnir eru á toppi deildinnar með fullt hús og það mun ekki breytast í kvöld. Þær fara í Úlfarsárdalinn og munu halda uppteknum hætti og sigra Fram. Spurning hvort Jóhanna Margrét sé ennþá í revange mode?

Stjarnan – Valur (Föstudagur 18:30)  /  Sigurvegari: Valur

Hafdís Renötudóttir spilaði 2 landsleiki um síðustu helgi svo hún er að komast aftur inn á parketið sem er ekki góðar fréttir fyrir Stjörnustelpurnar. Valur mun mæta í Garðabæinn og sýna mátt sinn og meginn og vinna Stjörnuna þægilega.

HK –  KA/Þór (Föstudagur 19:00)  /  Sigurvegari: KA/Þór

KA/Þór komst á blað í deildinni með góðum sigri á Stjörunni í síðasta leik og það mun hafa gert mikið fyrir liðið. HK tapaði fallbaráttuslag við Selfyssinga á sama tíma svo þetta er svakalegur botnslagur sem mun eiga sér stað á morgun í Kórnum. KA/Þór mun halda uppteknum hætti frá síðustu umferð og vinna HK í algjörum naglbít.

Grótta – ÍBV (Laugardagur 14:00)  /  Sigurvegari: ÍBV

ÍBV unnu iðnaðarsigur á Fram í síðasta leik fyrir landsleikjahlé í Eyjum meðan Grótta tapaði gegn Val. ÍBV mun vilja hefna fyrir ófarirnar í bikarkeppninni í fyrra þar sem Grótta sló þær óvænt úr keppni. Gæðamunurinn á þessum leiðum er ennþá talsverður og ÍBV mun vinna nokkuð þægilegan sigur á Nesinu á laugardaginn.

1.umferð (4 réttir)
2.umferð (4 réttir)
3. umferð (4 réttir)
4.umferð (5 réttir)
5.umferð (3 réttir)
6.umferðir (4 réttir)