Karen Tinna Demian, leikmaður ÍR, var borin af velli eftir þungt högg í 29-22 tapi gegn Fram í Olís-deild kvenna í dag. Samkvæmt heimildum Handkastsins eru meiðslin vægari en óttast var í fyrstu.

Atvikið átti sér stað í upphafi síðari hálfleiks þegar Karen Tinna og Katrín Anna Ásmundsdóttir, leikmaður Fram, lentu í hörðum árekstri í þann mund sem Karen Tinna sótti að marki Fram. Karen Tinna fékk aðhlynningu á vellinum í nokkrar mínútur áður en hún var borin af velli, að því er mbl.is greinir frá.

Samkvæmt heimildum Handkastsins fékk Karen Tinna hnykk á hálsinn. Hún sat á varamannabekk ÍR undir lok leiks.

Karen Tinna skoraði fimm mörk og var lengi vel markahæst hjá ÍR. Sara Dögg Hjaltadóttir endaði markahæst í liði ÍR með sex mörk.

Hægt er að sjá atvikið hér að neðan.