Norska markvarðargoðsögnin Katrine Lunde er komin í nýtt hlutverk sem markvarðarþjálfari en það er þó enn óvíst hvort hún muni sjálf stíga inná handboltavöllinn.

Eftir að samningi hennar við danska liðið Odense lauk í vor er framtíð landsliðs markvarðarins óljós. Hún hefur þó tryggt sér nýtt hlutverk hjá Randesund í Kristiansand, þar sem hún verður markvarðaþjálfari. Þar sem hún mun starfa við hlið tvíburasystur sinnar, Kristine Lunde-Borgesen, sem er aðstoðarþjálfari liðsins.

,,Við erum ánægð með að Katrine vilji leggja sitt af mörkum. Hún er ótrúlega góð með unga leikmenn," segir Morten Løvø, formaður Randesund.

En á meðan Lunde tekur sér starf utan vallar er framtíð hennar innan vallar með öllu óljós og stór spurning hvort að hún verði með norska landsliðinu þegar að heimsmeistaramótið hefst í desember. Tvö af stærstu liðum Noregs, Storhamar og Sola, hafa nú þegar útilokað að hún verði í þeirra röðum. En landsliðþjálfarinn Ole Gustav Gjekstad vill þó halda dyrunum opnum fyrir því að Lunde muni spila með landsliðinu á HM.

,,Það er fræðilega mögulegt svo lengi sem hún heldur sér í góðri æfingu," segir hann við VG sporten.

,,Hún þarf ekki endilega að spila tvo leiki í viku, en hún verður að ná að æfa vel."

Þannig gæti þessi 45 ára goðsögn, sem hefur spilað á hæsta stigi í tæp 30 ár, mætt á HM án þess að vera skráð hjá nokkru félagsliði.