Nýr markvörður TTH Holstebro, Gustavo Capdeville, segist hlakka til nýs lífs í Danmörku þar sem rólegra umhverfi bíður hans og fjölskyldunnar eftir undanfarin ár í stórborginni Lissabon.

Portúgalski landsliðsmarkvörðurinn kemur til Holstebro frá Benfica, þar sem hann hefur verið einn af lykilmönnum liðsins. Nú bíður hans hins vegar allt annað umhverfi í Holstebro.

„Ég veit að Holstebro er með um 50.000 íbúa. Fyrir mig, sem kem frá Lissabon, er þetta lítill bær. En þar er allt sem ég þarf,“ sagði Capdeville í tímariti TTH, Timeout.

Hinn 28 ára gamli markvörður hefur þegar heimsótt nýja heimabæ sinn þrisvar sinnum frá því hann skrifaði undir samning við félagið og segir viðtökurnar hafa verið afar góðar.

„Ég hef fundið fyrir hlýjum móttökum í hvert skipti sem ég hef komið hingað. Fjölskyldan mín kunni líka vel við kyrrðina í bænum. Lissabon er stór og iðandi af lífi. Hér er allt öðruvísi og ég held að það verði mikilvægt fyrir okkur.“

Capdeville hefur einnig þegar hafið nám í dönsku til að auðvelda aðlögunina að nýju lífi og nýju félagi.

Eftir að hafa verið áberandi hjá Benfica tekur portúgalski landsliðsmarkvörðurinn nú næsta skref á ferlinum með TTH Holstebro, þar sem hann vonast til að njóta bæði handboltans og rólegra lífs utan vallar.