Better Collective hefur áfrýjað dómi sem féll í síðasta mánuði þar sem fyrirtækinu var gert að greiða samtals 6,6 milljónir danskra króna í bætur til Mathias Gidsel, fjölda annarra danskra íþróttamanna og Danska handknattleikssambandsins.

Málið snýst um notkun mynda af þekktum dönskum íþróttamönnum í tengslum við veðmálaefni án þess að samþykki hefði verið fengið fyrir þeirri notkun.

Better Collective staðfesti við Ekstra Bladet að fyrirtækið hefði ákveðið að áfrýja niðurstöðunni.

„Ég get staðfest að dómnum hefur verið áfrýjað þar sem við teljum að málið varði mikilvægar lagalegar meginreglur,“ sagði Toke Parbo Hansen, framkvæmdastjóri hjá SpilXperten, í skriflegu svari.

SpilXperten er í eigu Better Collective og var það miðillinn sem birti efnið sem deilan snýst um.

Auk Mathias Gidsel voru um tuttugu danskir handknattleiksmenn aðilar að málinu ásamt Danska handknattleikssambandinu. Þá áttu badmintonstjörnurnar Viktor Axelsen og Anders Antonsen einnig aðild að málinu.

Stefnendur töldu að myndir af þeim hefðu verið notaðar í viðskiptalegum tilgangi í tengslum við umfjöllun um veðmál án þess að tilskilið leyfi hefði verið veitt.

Með áfrýjun Better Collective mun endanleg niðurstaða málsins því bíða um sinn.