Danska úrvalsdeildarfélagið Skjern hefur fengið til liðs við sig sænsku markmannsgoðsögnina Dan Beutler sem nýjan markmannsþjálfara.

Danska félagið greindi frá ráðningunni á Facebook-síðu sinni en Beutler hefur nú þegar hafið störf hjá danska félaginu.

Beutler er 48 ára gamall og á að baki farsælan feril sem markvörður. Hann lék meðal annars í þýsku Bundesligunni með SG Flensburg-Handewitt og HSV Hamburg og var einnig um árabil í sænska landsliðinu.

Svíinn hefur því mikla reynslu úr hæsta gæðaflokki handboltans og mun nú miðla þekkingu sinni til markvarða Skjern.