Danska úrvalsdeildarfélagið Bjerringbro-Silkeborg hefur fest kaup á einu mesta efni í norskum handknattleik. Leikstjórnandinn Ciljan Sagosen hefur skrifað undir fjögurra ára samning við félagið og mun leika með liðinu frá og með komandi tímabili.

Sagosen, sem er aðeins 18 ára gamall, vakti mikla athygli með Bergen á síðasta tímabili þar sem hann var valinn nýliði ársins í norsku úrvalsdeildinni. Frammistaða hans skilaði honum einnig fyrstu A-landsleikjunum fyrir Noreg í maí á þessu ári.

„Ciljan Sagosen er leikmaður með gríðarlega þróunarmöguleika. Hann átti frábært tímabil í norsku deildinni þar sem hann sýndi að hann getur staðið sig á hæsta stigi. Það var einnig verðlaunað með vali í norska A-landsliðið,“ sagði Peter K. Bertelsen, yfirmaður íþróttamála hjá Bjerringbro-Silkeborg.

Hann segir Sagosen falla afar vel að leikstíl félagsins.

„Ciljan býr yfir sterkum einstaklingshæfileikum og hefur mikinn metnað til að læra og bæta sig. Hann passar mjög vel við þann handbolta sem við viljum spila hjá BSH og við sjáum mikla möguleika í að taka þátt í áframhaldandi þróun hans.“

Sagosen segir Bjerringbro-Silkeborg hafa verið augljósan kost þegar tækifærið gafst.

„Mér finnst BSH vera með afar spennandi leikmannahóp og verkefni sem ég vil vera hluti af. Ég var stoltur af því að svona stórt félag hefði áhuga á mér. Ég vona að ég geti lagt mitt af mörkum frá fyrsta degi og hjálpað félaginu að vinna titla. Danska deildin er næststerkasta deild heims og ég hlakka til að spila á þessu stigi og verða betri handboltamaður.“

Sagosen, sem er fæddur 13. desember 2007, er 185 sentímetrar á hæð og hefur áður leikið með Bergen Håndball og Charlottenlund SK. Samningur hans við Bjerringbro-Silkeborg gildir til sumarsins 2030.