Handknattleiksdeild þýsku Bundesligunnar (HBL) hefur hafnað kröfum HSG Krefeld í hinu umtalaða leyfismáli sem hefur verið eitt stærsta deilumál sumarsins í þýskum handknattleik.

Málið snýst um að HSG Nordhorn-Lingen, lið Elmars Erlingssonar fékk keppnisleyfi í 2. Bundesligunni þrátt fyrir að félagið hafi síðar viðurkennt að vera í erfiðri fjárhagsstöðu. HSG Krefeld, sem féll úr deildinni á síðustu leiktíð, telur að Nordhorn hafi ekki uppfyllt skilyrði til að fá leyfið og hafi veitt rangar eða ófullnægjandi upplýsingar um fjárhag sinn við leyfisumsóknina.

Krefeld hefur því krafist þess að leyfi Nordhorn verði fellt úr gildi og að félagið sjálft fái í staðinn sæti í 2. Bundesligunni á komandi tímabili. Félagið hefur jafnframt höfðað einkamál og lagt fram kæru vegna málsins.

Nú hefur óháð trúnaðarráð HBL tekið afstöðu til kærunnar. Í yfirlýsingu deildarinnar kemur fram að engin gögn bendi til þess að leyfi Nordhorn hafi verið veitt með ólögmætum hætti. Nefndin segir að leyfisnefndin hafi byggt ákvörðun sína á þeim upplýsingum sem lágu fyrir þegar leyfið var veitt vorið 2026 og að ekkert bendi til þess að sú ákvörðun hafi verið röng eða ólögmæt.

Af þeim sökum var öllum kröfum Krefeld hafnað og félagið fær því ekki keppnisleyfi í 2. Bundesligunni.

Þrátt fyrir þessa niðurstöðu virðist málinu þó ekki lokið. Krefeld hefur þegar gripið til frekari lagalegra aðgerða og hyggst halda áfram að reyna að fá ákvörðuninni hnekkt fyrir dómstólum. Á meðan getur HSG Nordhorn-Lingen haldið áfram undirbúningi sínum fyrir keppnistímabilið í 2. Bundesligunni, en málið gæti enn átt eftir að þróast á næstu vikum.