Füchse Berlin er eitt af sterkustu handknattleiksfélögum Evrópu og hefur á undanförnum árum byggt upp gríðarlega sterkt lið. Félagið hefur þó ekki stærstu fjárhagsáætlunina í þýsku Bundesligunni.

Þetta segir Bob Hanning, framkvæmdastjóri félagsins, sem ræddi fjárhagsstöðu Füchse Berlin á blaðamannafundi fyrir upphaf nýs tímabils.

„Fjárhagslega erum við, held ég, í efsta þriðjungnum. Við erum ekki alveg á toppnum. Það eru örugglega fimm eða sex lið sem eru með stærri fjárhagsáætlun en við,“ sagði Hanning samkvæmt Handball-World.

Füchse Berlin hefur að undanförnu kynnt til sögunnar nýja samstarfsaðila en Hanning segir félagið jafnframt leggja mikla áherslu á að halda rekstrinum eins einföldum og mögulegt er. Mikið sé unnið í sjálfboðavinnu og tiltölulega fáir starfsmenn starfi hjá félaginu.

Í stað þess að verja stórum hluta fjármuna í umfangsmikla skrifstofu vill félagið fjárfesta í því sem Hanning telur vera framtíð Füchse Berlin, uppbyggingu ungra leikmanna.

„Við reynum með sem fæstum einstaklingum að fá sem mest út úr starfinu vegna þess að við viljum frekar verja peningunum í unglingastarf og uppbyggingu. Án unglingastarfs og þróunar ættum við ekki möguleika,“ sagði Hanning.

Füchse Berlin hefur á undanförnum árum verið með nokkra af bestu leikmönnum heims í sínum röðum. Þar má meðal annars nefna Mathias Gidsel og Simon Pytlick, sem komu til félagsins fyrir háar fjárhæðir. Hanning bendir einnig á Dika Mem sem dæmi um leikmann sem kostar verulegar fjárhæðir á leikmannamarkaðnum.

Félagið geti því ekki einfaldlega farið út á markaðinn og keypt alla þá leikmenn sem það þarf til að keppa við fjárhagslega sterkustu félög Evrópu. Þess vegna er uppbygging úr eigin röðum svo mikilvæg.

Bob Hanning nefnir meðal annars Matthes Langhoff, Tim Freihöfer og Nils Lichtlein sem leikmenn sem hafa stigið upp í gegnum kerfi félagsins og náð að festa sig í sessi á hæsta stigi.

„Ef við hefðum ekki möguleika á því að draga okkar eigin ungu leikmenn stöðugt upp og þróa unga leikmenn í landsliðsmenn, þá ættum við ekki möguleika í þessu sirkusi þeirra stóru,“ sagði Hanning.

Füchse Berlin þarf því að sameina stórar fjárfestingar í leikmönnum á borð við Gidsel og Pytlick við öflugt uppeldisstarf. Það er sú blanda sem hefur gert félaginu kleift að berjast við stærstu og ríkustu félög Evrópu – þrátt fyrir að vera ekki með stærstu fjárhagsáætlunina.