Stymmi Klippari mun í allan vetur spá í spilin og tippa á hvernig komandi umferð mun fara í Olís deildum karla og kvenna.

Hér að neðan má sjá hvernig hann telur að 9.umferð fari í Olís deild kvenna.

Valur – ÍR(Miðvikudagur 19:30)  /  Sigurvegari: Valur

Valskonur hafa verið að finna sitt fyrra form hægt og rólega og þá helst Hafdís Renötudóttir sem labbar varla inná handboltavöllinn þessa dagana án þess að vera með 40% markvörslu eða meira. ÍR hafa aðeins misst flugið eftir góða byrjun og því miður fyrir þær þá mun Valur vera of stór biti fyrir þær í kvöld þó þær eigi góðar minningar frá Hlíðarenda síðan í fyrra.

KA/Þór – Fram (Föstudagur 19:00)  /  Sigurvegari: Fram

Fram komst loksins aftur á sigurbraut í síðustu umferð. Eins og allir vita þá næra sigrar og Fram eru komnar á beinu brautina aftur. KA/Þór tapaði gegn Selfoss í síðustu umferð en þessi 4 stig sem þær eru komnar með verða aldrei tekin af þeim. Fram mun fara norður á föstudaginn og taka bæði stigin heim.

Selfoss – Stjarnan (Föstudagur 20:15)  /  Sigurvegari: Selfoss

„Nýliðar“ Selfoss hafa verið frábærar í upphafi tímabilsins eftir að hafa tekið sæti Víkinga með rúmlega viku fyrirvara. Stjarnan hefur ekki náð að finna sig á tímabilinu síðan þær unnu Gróttu á Nesinu fyrr í vetur. Selfoss mun halda sínu góða gengi á heimavelli áfram og taka bæði stigin.

HK –  Grótta (Laugardagur 13:30)  /  Sigurvegari: Grótta

Grótta hefur heillað mig mikið í upphafi tímabils þó stigasöfnunin hafi ekki verið eins mikil og þær eflaust vilja. HK hefur verið að ströggla eins og við gerðum ráð fyrir. Grótta mun gera góða ferð upp í Kórinn á laugardaginn og fara með sigur af hólmi í hörkuleik sem mun ráðast á síðustu 10 mínútum leiksins.

Haukar – ÍBV (Laugardagur 14:00)  /  Sigurvegari: Haukar

Stórleikur umferðinnar. Liðin í efstu tveim sætum deildarinnar mætast. Verður Birna Berg klár hjá Eyjakonum? Er hægt að stöðva Haukana? Þetta eru spurningar sem við þurfum að bíða fram á laugardag til að fá svör við. Ef Birna Berg er með eiga Eyjakonur klárlega séns í Haukana en án hennar verður þetta erfitt. Ég ætla tippa á að Eyjakonur hvíli Birnu eitthvað áfram og verði án hennar í þessum leik og Haukar muni því klára þennan leik með sigri og halda áfram sigurgöngu sinni í deildinni.

1. umferð (4 réttir)
2.umferð (4 réttir)
3. umferð (4 réttir)
4. umferð (5 réttir)
5. umferð (3 réttir)
6. umferði (4 réttir)
7. umferði (4 réttir)
8. umferð (5 réttir)